អង់គ្លេស៖ ក្លិបបាល់ទាត់ Coventry City បានសាងភាពភ្ញាក់ផ្អើលមិនគួរឱ្យជឿក្នុងការប្រកួតទល់នឹង Wolverhampton កាលពីយប់មិញ ជាមួយគ្រាប់បាល់បញ្ចូលទី២ គ្រាប់នៅម៉ោងបន្ថែម និងទម្លាក់ Wolves ក្នុងលទ្ធផលសរុប ៣-២។ ជ័យជម្នះនេះមានន័យថា Coventry City នឹងបន្តឡើងទៅកាន់វគ្គពាក់កណ្ដាលផ្តាច់ព្រ័ត្រ​ FA Cup ជាលើកដំបូងបង្អស់រាប់ចាប់តាំងពីឆ្នាំ១៩៨៧ ដែលកាលណោះ Coventry City គឺជាជើងឯកនៃពានរង្វាន់់បាល់ទាត់ចំណាស់ជាងគេបំផុតលើពិភពលោកមួយនេះ។

ការប្រកួតនៅកីឡដ្ឋាន Molineux នេះចាប់ផ្តើមមានគ្រាប់បាល់ដំបូងបង្អស់ពីសំណាក់ខ្សែប្រយុទ្ធ Ellis Simms របស់ក្រុមភ្ញៀវ Coventry City ដែលធ្វើបាននៅនាទីទី៥៣ ខណៈ ៧នាទីមុនចប់ការប្រកួតក្រុមម្ចាស់ផ្ទះ Wolves ក៏បានតាមស្មើដោយគ្រាប់បាល់របស់ Rayan Ait-Nouri មុនបន្ថែមគ្រាប់នាំមុខនៅនាទី៨៨ ដោយកីឡាករ Hugo Bueno។ គ្រប់យ៉ាងស្ទើរតែចប់សព្វគ្រប់ទៅហើយសម្រាប់ Coventry ប៉ុន្តែយ៉ាងណាមិញ Ellis Simm ដែលជាអ្នករកបានគ្រាប់ដំបូង នៅតែជាអ្នកបង្កើតបដិហារសម្រាប់ក្រុមដដែល ពោលគឺបានស៊ុតបញ្ចូលទីនៅនាទី៩០+៧ តាមស្មើ ហើយកីឡាករសញ្ជាតិអាមេរិក Haji Wright បានក្លាយជាវីរបុរសនៃក្រុមលីគទី២ មួយនេះជាមួយគ្រាប់បាល់ជ័យជម្នះនៅនាទីទី៩០+១០ និងជួយក្រុមឡើងទៅវគ្គពាក់កណ្ដាលផ្តាច់ព្រ័ត្រ FA Cup ក្រោយខកខានឡើងមកវគ្គនេះជិត ៤ទស្សវត្ស។

យប់មិញនេះដែរ ក្រុមមេឃខៀវ Manchester City ក៏បានកក់កៅអីឡើងមកវគ្គពាក់កណ្ដាលផ្តាច់ព្រ័ត្រ FA Cup រួចរាល់ដូចគ្នា ជាមួយជ័យជម្នះ ២-០ ទល់នឹងក្រុមលីគកំពូលសារិកាព្រៃ Newcastle United។ ដោយឡែក ការប្រកួតដើម្បីស្វែងរកក្រុមឈានទៅវគ្គពាក់កណ្ដាលផ្តាច់ព្រ័ត្រនៅតែបន្តនារាត្រីនេះដោយ Chelsea នឹងត្រូវស្វាគមន៍ក្រុមភ្ញៀវ Leicester City នៅវេលាម៉ោង ៧ៈ៤៥នាទីយប់ ខណៈ Manchester United ជួបជាមួយ Liverpool នៅម៉ោង ១០និង៣០នាទីយប់៕